“WIKA KO KAYAMANAN KO”

            Ang wika ang susi at kaluluwa ng ating lahi. Ginagamit ang wika sa mga salitang nagpapahayag ng diwa at damdamin. Dahil sa wika ang ating mga hinaing o saloobin ay naipapahayag sa maganda man o pangit na paraan, Masaya man o malungkot ang ating sasabihin. Ang mahalaga ay nagagamit natin ang ating sariling wika sa masining o malikhaing pamamaraan ng pagpapahayag ng damdamin. Sa pamamagitan nito dito natin malalaman kung gaano tayo ka epektibo sa pagsasalita at pakikipagusap o pakikipag komyunikeyt sa ating kapwa. Ayon naman kay Noah Webster ang wika raw ang siyang tagapagpahayag ng mga ideya; sakali mang hindi mapangalagaan ang identidad nito, tiyak na mawawalan din ng saysay ang ideyang nakapaloob dito. Sa madaling salita kapag napabayaan ang wika at kapag hindi ito ginamit ng wasto mawawalan ng bisa o saysay ang paggamit sa wika at hindi na magiging makabuluhan ang wika. Naniniwala ako na kung ano ang kapangyarihang taglay ng wika ay siya ring kapangyarihan ng ating kultura. Bilang estudyante, bilang Pilipino at bahagi ng mundo para sa akin ang wika ang nagbibigkis sa mga tao at ito rin ang nagbibigay ng kahulugan at kulay sa ating kinagisnang kultura. Napaka laki ng kaugnayan ng wika sa ating kultura dahil kung walang wika walang kultura. Ang wika ay kakambal ng kultura dahil sa tuwing ginagamit natin ng tama ang wika dito maibabase o masasalamin kung anong klaseng kultura meron tayong mga Pilipino. Ayon sa aking guro noon ang wika ay itinuturing na pangunahing instrumento ng tao tungo sa mabisang interaksyon o komunikasyon sa ating kapwa. Napaka halaga ng wika una sa sarili dahil sa paggamit ng wika nagagawa ng tao na mapaunlad ang kanyang sarili sa pamamagitan ng pagtatamo ng mga kaalaman sa kanyang paligid. Dahi dito, nagagawa rin niyang maipahayag ang kanyang mga naisin at mithiin sa buhay na may malaking epekto tungo sa pampersonal na kasiyahan. Ikalawa, mahalaga ang wika sa bawat isa sa atin dahil kinakailangan nating makipagkomyunikeyt upang mapatatag ang relasyong sosyal. Nagagawa rin ng wika na mas mapalawak pa ang ating karanasan sa buhay. ikatlo, mahalaga ang wika sa lipunan bakit? Dahil sa wika nagkaka buklod-buklod ang mga tao sa lipunan. Isa ring halimbawa ng ka importantehan ng wika ay ang mga ginawang kasulatan o sulat ng ating magiting na bayani na si Dr. Jose Protacio Rizal Y Realonda. Ginamit niya ang kanyang kakayahan sa pagsusulat sa masining na paraan at yun ay upang bigyang linaw at pag-asa ang mga kapwa kababayan na mag-alsa, magprotesta at ipag laban ang kanilang karapatan laban sa mga prayle at mga sundalong kastila. Sa pagpapamalas ni Rizal ng kanyang katalinuhan sa pamamaraan ng kanyang malikhaing pagsulat at paggamit ng mga matatalinhaga o mabubulaklak na mga pananalita ay namulat o natauhan ang mga Pilipino sa kabila ng pagkabulag at pagkabingi nila sa mga katiwalian, kasamaan at pang-aabusong ginawa ng mga kastila sa mga Pilipino.  Ang kagitingan ni Rizal ay nagsilbing susi sa kamalayan ng mga Pilipino at dahil sa kanya nagkaisa at nagkaroon ng katatagan ang mga Pilipino upang magkaroon ng katarungan at ipaglaban ang kalayaan. Ang pagmamahal sa sariling wika ay sadyang wagas na mahalaga dahil ang wika ay parte ng buhay nating mga tao dapat natin itong pahalagahan at pagyamanin. Nasa tao kung papaano niya gagamitin ang wika. Sana isa-isip at isa puso nating lahat na ang wika ay importante sa pag debelop ng ating pamayanan. Ating pagyamanin at pakaingatan ang ating wika dahil pamana at bigay sa atin ito ng Diyos. Maswerte tayo dahil may wika paano kung walang wika? Kung walang komunikasyon siguro, lahat tayo ay hindi magkakaintindihan. Minsan tayong mga tao hindi natin namamalayan na sa sobrang paggamit natin sa wika ay mali na pala ang ating nasasabi at minsan pa ay nakakasakit na pala tayo ng damdamin ng ating kapwa. Kaya dapat piliin ng wasto ang mga salitang gagamitin bago ito sabihin, bigkasin o bitawan. Hindi lamang isinisimbolo ng wika ang kultura ng bawat lipunan kundi sumisimbolo rin ang wika sa katangian, kabuuan at pagkatao. Maging maingat, matalino at masining sa paggamit ng wika. May kaugnayan ang wika sa lahat ng bagay sa mundo. Para sa akin importante ang wika sa mga mag-aaral dahil ang edukasyon ay isa sa matibay na basehan na nagbibigay importansya o kahalagahan sa gampanin ng wika.